【白田邨奇仔話當年】謝灶?其實係咪要報ICAC?

(本文不設書面語版本)

傳統上,過年前除咗「年廿八洗邋遢、年卅晚食圑年飯」以外,其中一個最重要嘅環節應該就係「謝灶」喇。由其係飲食業同埋一啲傳統嘅家庭,就更加重視。

灶君系邊個?

細過行過石峽尾邨家家戶門口都有個灶君嘅神位,細個吾知仲以為兩個門神就叫灶君;後來先知道,原來灶君係掌管廚房嘅神明,只係因為當時條件所限,大家都只能夠喺門口煮飯,所以放門口啫。

話說嗰個年代香港仲有大量徙置區、美荷樓仲住緊人嘅,大家仲用緊火水爐或者燒柴,廚房係家居意外嘅高危地點,一個唔小心會連間屋都燒埋添。於是,當時灶君就深得一班廚房師傅同媽媽嘅喜愛,因為煮煮吓嘢行開行埋有冇燒著嘢,或者有冇切親手就係靠佢睇住㗎啦;所以每逢年廿四阿媽、阿嫲都會喺廚房度準備好多祭品嚟多謝灶君。

謝灶有糖食?

細過謝灶我梗係最開心嗰個,唔係有幾神心,只係因為次次謝灶我同家姐都有「麥芽糖」食,分分鐘開心過兒童節呀,但係點解灶君鐘意食「麥芽糖」嘅呢?

媽媽呢係咁講嘅:相傳灶君吾單止睇住你屋企個爐頭,仲會負責視察呢一家人過去一年以黎嘅功過,年尾就返去回報俾玉皇大帝知(臥底?),而且玉皇大帝仲會憑呢一個報告去決定嚟緊一年呢家人嘅禍添;所以傳統上大家就希望用一啲甜嘅嘢食去討好灶君,希望報告個陣佢美言幾句(喂! ICAC呢?)。至於揀「麥芽糖」嘅呢,係希望除咗甜之外,仲可以黐住佢把嘴,等佢唔好講咁多(少講少錯?係咪有啲嘢錯咗呢?),保障未來一年大家平平安安、順風順水。

立春